Aird ar Sháróstaigh: beocht a chur i dteach tar éis caillteanais
I bhfaiteadh na súl bhí Marianne, Sáróstach, ina haonar sa 'Craftsman', áit a d'athchóirigh sí féin agus a fear céile, nach maireann, le chéile. Chun í féin a phiocadh suas, sheol sí a gnó féin, ag oscailt a baile in California d’aíonna ó gach cearn den domhan. Ina focail féin, roinneann sí an chaoi ar thug an óstáil brí nua dá saol agus an rud atá i gceist le bheith i d’fhiontraí baineann:
Bhí rud éigin tairbheach faoi shaol a bheith agat, daoine a bheith ag teacht ar ais isteach sa teach.
Nuair a chaill mé Mike, mhothaigh mé go raibh caillteanas agus folús mór ann. Chuaigh sé faoi obráid i mí na Bealtaine 2017, gnáthamh caighdeánach a bhí ann, ach bhí deacrachtaí ann agus níor éirigh leis teacht amach as. Ceithre lá roimhe sin, bhí 26 bliain le chéile ceiliúrtha againn.
Bhí m'iníon tar éis bogadh abhaile chun fanacht liom. Beagnach bliain ina dhiaidh sin, bhog sí ar shiúl agus go tobann, bhí mé liom féin sa teach.
Ní cuimhin liom eachtra ar leith nó an fáth ar thosaigh mé ag óstáil. Bhí sé i gcónaí ansin, áfach. Agus ansin chuaigh mé ar thuras i Meán Fómhair 2017 chun cairde a fheiceáil in Oregon, agus d’fhan mé in Airbnb ansin. Duine an-deas ab ea an t-óstach, agus mhínigh mé cad a tharla dom. Rith sé liom go bhféadfainn féin bheith i m'óstach.
Le bás m’fhear céile, tháinig deireadh lena phinsean agus ba chaillteanas mór ioncaim é sin. Oibrím dom féin mar mhúinteoir, scríbhneoir agus tírdhreachóir. Ní raibh mé in áit a bhféadfainn díriú ar aon rud.
I mo shamhlaíocht féin, bhí Airbnb ina fhoinse airgid an-éasca. Ach tá obair ag baint leis. Agus cinnte, toisc gur bean shingil mé, bhí imní orm faoi mo shábháilteacht. Cheannaigh mé glais do na seomraí aíonna agus do mo sheomra féin, ach ní dóigh liom gur chuir mé glas ar mo dhoras riamh ach uair amháin nuair a bhí fear eile ag seiceáil isteach an-déanach san oíche. Mhol cara liom atá ina óstach freisin go scríobhfainn an cur síos ar mo theach chun na daoine a theastaíonn uaim a mhealladh anseo, agus go dtí seo is cosúil gur oibrigh sé. B’fhéidir go bhfuil mé saonta, ach tá muinín áirithe agam go bhfuil daoine go maith den chuid is mó.
Thug an óstáil deis dom gan bheith i m'aonarán. Ba chúis a bhí ann go raibh orm an teach a choinneáil glan agus an chúis ar chuir mé cuma an mhisnigh orm féin. Caithfidh tú do chosa a chur fút arís. Rudaí maithe ab ea iad sin go léir.
Bím ag cuimhneamh ar Mike gach uair a thagann duine isteach. Bíonn sé brónach ach mothaím cumasaithe ag an am céanna.
Ba bhreá leis a bheith ag obair ar an teach seo. Siúinéir a bhí ann. Nuair a cheannaíomar an teach i 1995, bhí sé scriosta. Bhí go leor leor oibre le déanamh air agus chruthaigh sé áit a raibh sé go hálainn bheith inár gcónaí ann. Ar roinnt bealaí, mothaím a spiorad agus a fhuinneamh nuair a thagann daoine isteach sa teach, agus nuair a thugann siad an adhmadóireacht faoi deara, agus nuair a deir siad, "Ó, bhabh."
Táim an-bhródúil as. Braithim é don bheirt againn. Tá sé go hálainn gur féidir liom é sin a roinnt.
Ag an tús, déarfainn le haíonna gur cailleadh m’fhear le déanaí. Ansin diaidh ar ndiaidh, níorbh é sin an chéad rud a roinnn mé leo a thuilleadh.
Ba mhór an pléisiúr na haíonna a bhí agam. Toisc go bhfuil mé i mo chónaí in Santa Monica, theastaigh uathu dul go dtí an trá, chuig an gcé, agus go dtí Venice, agus, mar sin de, ní fhaca mé iad i ndáiríre. Bhí go leor spáis agus neart ciúnais fós ag teastáil uaim, agus, mar sin de, bhí sé foirfe.
Uaireanta, bheimis ag comhrá thar chupán caife nó inár suí ar luascán an phóirse le gloine fíona agus le gaoth na farraige. Bhí aíonna áille ann agus bhí sé an-éasca labhairt leo. Meabhrúchán a bhí ann go leanann an saol ar aghaidh, fiú más cliché é sin.
Bean óg ab ea aoi amháin. Ní dúirt mé léi go bhfuair Mike bás, ach b’fhéidir gur thug sí faoi deara a chuid pictiúr timpeall an tí. Dúirt sí liom gur chaill sí a buachaill cúpla mí roimhe sin i dtimpiste. Bhí mé san áit dhochreidte seo go raibh mé in ann ní hamháin an teach a oscailt, ach spás a chruthú di chun labhairt faoina caillteanas le duine a thuig céard a bhí i gceist leis sin. Agus domsa, bhí mise in ann labhairt léi faoi Mike. Bhí comhthuiscint eadrainn, comhuaineacht dhochreidte. Chuireamar téacsanna chuig a chéile cúpla uair. B’fhéidir go dtiocfaidh sí ar ais nó nach dtiocfaidh, chuireamar le saol a chéile ar feadh tamall beag.
Mar óstach, roinnimid spás, ach uaireanta is áit í ina roinnimid níos mó ná sin.
Agus mo theach á oscailt agam, bhí mé in ann rud éigin a thabhairt fiú nuair a mhothaigh mé chomh mór sin in ísle brí.
Anois tá mo ghnó féin agam. Agus is iontach an rud é bheith i do shaoiste ort féin agus an chumacht iomlán agat maidir leis an tslí a bhforbraíonn do shaol. Tá fíorchumhacht ann a mhothaíonn bean agus í ag rith a gnó féin.
B’fhéidir go gceapfadh daoine go bhfuil sé sách craiceáilte, ach tá rud éigin an-naofa faoi fháilte a chur roimh strainséir. Mar óstach, bímid inár dtreoraithe do thaistealaithe traochta. Agus nuair a bhímidne cráite, gortaithe agus uaigneach, soláthraíonn an idirghníomhaíocht agus an nasc sin beagán leighis dúinne.
Grianghraif le caoinchead Marianne