Tuilleamh ard a dhéanamh d'éileamh ard

Is féidir le féilte, imeachtaí móra agus dea-aimsir spéis i do liostú a ardú go tobann. Cuidíonn uirlisí óstála Airbnb leat tairbhe a bhaint as na tréimhsí ardéilimh sin. Smaoinigh ar na céimeanna seo chun do thuilleamh a uasmhéadú.

Bealach amháin le hullmhú do shéasúr ardéilimh is ea oícheanta breise a oscailt i d'fhéilire. Cuidíonn sé sin le do liostú a bheith le feiceáil i níos mó torthaí cuardaigh agus d'fhéadfadh sé do thuilleamh a mhéadú.

Téigh chuig féilire do liostaithe agus cuardaigh oícheanta a bhfuil bac orthu. Bíonn dath liath orthu sin. Oscail aon oícheanta a bhfuil bac orthu ach ar féidir leat iad a óstáil.

Nuair a chuireann tú le d'achar infhaighteachta, is féidir le haíonna áirithint a dhéanamh níos faide chun tosaigh. Tá an straitéis sin éifeachtach, go háirithe i gceantair a bhfuil tréimhsí ardéilimh intuartha acu, amhail imeachtaí móra bliantúla agus séasúir sneachta agus trá.

Osclaíonn d'fhéilire lá amháin ag an am beag beann ar an tréimhse infhaighteachta atá agat. Mar shampla, más 12 mhí atá i gceist le d'achar infhaighteachta, is féidir le haíonna d'áit a chur in áirithe suas le bliain amháin ó dháta an lae inniu agus nuashonrófar d'infhaighteacht go laethúil.

Seiceáil praghsanna liostuithe den chineál céanna i do cheantar le bheith iomaíoch i gcónaí le linn séasúir ardéilimh. Chun do liostú a chur i gcomparáid le liostuithe den chineál céanna, téigh chuig féilire do liostaithe agus roghnaigh raon dátaí suas le 31 lá.

Feicfidh tú meánphraghsanna liostuithe den chineál céanna ar léarscáil de do cheantar. I measc na dtosca a rialaíonn cad iad na réadmhaoine atá cosúil le do liostú féin tá suíomh, méid, gnéithe, saoráidí, rátálacha, léirmheasanna agus na liostuithe eile a mbreathnaíonn aíonna orthu agus iad ag smaoineamh ar do liostúsa.

Is gnách go mbíonn rangú níos airde sna torthaí cuardaigh ag liostuithe ar a bhfuil praghsanna níos ísle ná liostuithe den chineál céanna in aice láimhe.

Má thairgeann tú an praghas céanna gach oíche, smaoinigh ar do phraghsáil a athrú i rith na seachtaine agus ag an deireadh seachtaine chun teacht le hathruithe ar an éileamh. Is féidir le praghsáil dhinimiciúil cabhrú leat an líon áirithintí a uasmhéadú.

Is bealach eile chun do liostú a thabhairt chun suntais i measc aíonna é lascainí a thairiscint. Is féidir leat freastal ar éagsúlacht taistealaithe ach na lascainí seo a thairiscint:

• Lascainí seachtainiúla agus míosúla. Cuir lascainí seachtainiúla ar fáil ar thréimhsí fanachta seacht n‑oíche nó níos faide nó lascainí míosúla ar thréimhsí fanachta 28 n‑oíche nó níos faide. D'fhéadfadh sé sin síneadh a chur leis an meánfhad fanachta ag do liostuithe go léir agus líon na n-athruithe a laghdú.
• Lascaine luatháirithinte. Cuir lascaine le háirithintí a dhéantar idir mí amháin agus 24 mhí roimh an tseiceáil isteach, agus forbair bonn láidir áirithintí roimh na séasúir ghnóthacha.
• Lascaine ag an nóiméad deiridh. Dá laghdófá do phraghas in aghaidh na hoíche de réir mar a dhruideann an dáta don tseiceáil isteach leat, d'fhéadfadh sé cabhrú leat taistealaithe a chuireann turas in áirithe ar ala na huaire a mhealladh. Is féidir le lascainí ar áirithintí a dhéantar idir lá amháin agus 28 lá roimh an tseiceáil isteach cabhrú leat d'fhéilire a líonadh agus do chuid tuillimh a mhéadú.

Feiceann aíonna aibhsiú speisialta sna torthaí cuardaigh agus ar leathanach do liostaithe faoi lascainí seachtainiúla, míosúla nó ag an nóiméad deiridh 10% nó níos mó agus faoi lascainí luatháirithinte 3% nó níos mó. Feictear do phraghas lascainithe in aice le do phraghas bunaidh, a mbeidh líne tríd.

Tabhair faoi deara nach mbíonn an lascaine luatháirithinte ar fáil nuair atá Praghsáil Chliste casta air agus go gcaithfidh lascainí a bhaineann le fad fanachta cloí le rialacha agus rialacháin áitiúla.

Tarraingíonn grianghraif iontacha aird, tugann siad le tuiscint d'aíonna an méid atá rompu agus tugann siad níos mó muiníne dóibh chun do theach a chur in áirithe. Smaoinigh ar ghrianghraif do liostaithe a nuashonrú agus tú ag ullmhú do shéasúir ardéilimh.

• Pleanáil do chuid íomhánna. Dírigh ar phictiúir a fháil a chuireann sonraí uathúla, saoráidí a bhfuil tóir orthu, agus gnéithe inrochtaineachta do thí ar taispeáint. Gabh gach seomra agus limistéar ar féidir le haíonna iad a úsáid ó uillinneacha éagsúla.
• Uaslódáil íomhánna cothrománacha ardtaifigh. Ba cheart 800 picteilín faoi 1,200 picteilín ar a laghad a bheith sna grianghraif. Is fearr méideanna comhaid níos mó, suas le thart ar 10 meigibheart.
• Faigh gairmí. Smaoinigh ar ghrianghrafadóir gairmiúil a fhostú chun cabhrú leat. Is féidir le Airbnb tú a chur i dteagmháil le gairmí i gcathracha ar leith ar fud an domhain.
• Cruthaigh camchuairt ghrianghrafadóireachta. Déanann uirlis Airbnb do chuid íomhánna uaslódáilte a shórtáil go huathoibríoch de réir an tseomra chun cabhrú le haíonna leagan amach do thí a thuiscint. Is féidir leat grianghraif a bhogadh, a bhaint agus a chur léi, sonraí a chur le gach seomra, agus fotheidil a chumadh do gach grianghraf.

Bealach eile chun do liostú a dhéanamh níos mealltaí ná an tseiceáil isteach agus an tseiceáil amach a shimpliú.

• Cuir féinseiceáil isteach ar fáil. Cuireann glas cliste, eochaircheap nó bosca glais ar chumas aíonna an glas a bhaint den bhealach isteach le cód. Is fearr le go leor aíonna an áisiúlacht agus an tsolúbthacht a bhaineann le féinseiceáil isteach, agus is d'fhéadfadh sí am a shábháil duitse freisin. Cibé modh a roghnóidh tú, tá sé tábhachtach cód rochtana uathúil a thabhairt do gach aoi a dhéanann áirithint.
• Cuir treoracha don tseiceáil amach ar fáil. Cuir céimeanna soiléire simplí iontu, amhail an áit le heochracha a fhágáil agus na rudaí is gá a mhúchadh.

“Tá sé tábhachtach gan ró-ualach a chur ar aíonna leis na tascanna sin toisc nach mian liom gurb é a gcuimhne dheireanach ar an áit ná an liosta sin roimh an tseiceáil amach,” arsa Katie, ball de Bhord Comhairleach na nÓstach agus Sáróstach in Palm Springs, California. “D'fhéadfá léirmheas cúig réalta a thuilleamh duit féin toisc nár fhág tú liosta fada tascanna le déanamh ag an tseiceáil amach."

Cabhraíonn na céadta Club Óstach ar fud an domhain le hóstaigh Airbnb teacht le chéile agus foghlaim óna chéile. Chonaiceamar go dtuilleann baill de na clubanna áitiúla sin a dhá oiread le hais óstaigh nach baill de chlub iad,* agus tá sé beagnach a thrí oiread níos dóichí go mbeidh siad ina Sáróstaigh.**

I measc na ngníomhaíochtaí club a bhfuil tóir orthu tá:

• Leideanna óstála a mhalartú a d'fhéadfadh do chuid tuillimh a mhéadú
• Rialacháin maidir le lóistín ar chíos gearrthéarmach a phlé
• Seirbhísí áitiúla iontaofa (glantóirí, pluiméirí, srl.) a roinnt
• Freastal ar imeachtaí líonraithe eisiacha

*De réir shonraí inmheánacha Airbnb, agus meántuilleamh agus meánrátálacha ball de Chlubanna Óstach Airbnb ar fud an domhain á gcur i gcomparáid le pobal iomlán na n‑óstach ó Mheán Fómhair 2022 go dtí Meán Fómhair 2023. Athraíonn na sonraí tuillimh de réir na háite, na séasúrachta agus an chineáil liostaithe.

**De réir shonraí inmheánacha Airbnb maidir le stádas Sáróstaigh d'óstaigh a thosaigh idir mí Iúil 2023 agus mí Iúil 2024.

Is tusa a rialaíonn do phraghsáil agus do shocruithe eile i gcónaí. D'fhéadfadh do thorthaí a bheith éagsúil.

Íocadh óstaigh as a rannpháirtíocht sna hagallaimh.

Tá leideanna óstála faoi réir an dlí áitiúil.

Seans gur athraigh an t-eolas atá sa mhír seo ó foilsíodh í.