Áirithint ar an bPointe a thuiscint

Tugann Áirithint ar an bPointe deis d'aíonna do theach a chur in áirithe láithreach ar na dátaí atá ar fáil ionas nach mbeidh ort gach iarratas ar áirithint a athbhreithniú agus a ghlacadh ceann ar cheann. Is maith le haíonna an rogha Áirithint ar an bPointe a úsáid agus tuairiscíonn go leor Óstach go dtuilleann siad níos mó airgid tríd an uirlis seo a úsáid agus go mbíonn siad buíoch as an éascaíocht a bhaineann léi freisin.

Tá sé fíorthábhachtach d'fhéilire a choinneáil cothrom le dáta chun lánleas a bhaint as Áirithint ar an bPointe. Má tá d'fhéilire as dáta, b'fhéidir go bhfaighfeá áirithintí gan choinne nó go mbeadh ort áirithint a chur ar ceal mar gheall ar earráid sceidealaithe, a bhféadfadh táille chealaithe a bheith mar thoradh air. Chun a chinntiú go bhfuil d'fhéilire Airbnb cothrom le dáta i gcónaí, is smaoineamh maith é a shioncronú le do phríomhfhéilire (iCal, Google, srl.).

D'fhéadfadh drogall a bheith ar roinnt Óstach Áirithint ar an bPointe a úsáid de bharr imní nach mbeidh mórán eolais acu faoi aíonna ionchasacha sula ndéanfaidh siad áirithint. Sular féidir le haíonna Áirithint ar an bPointe a úsáid, ní mór dóibh do chuid riachtanas d'aíonna ar fad a chomhlíonadh agus aontú le do Rialacha Tí.

Is féidir leat do riachtanais a shocrú ionas nach mbeidh Áirithint ar an bPointe ar fáil ach amháin d'aíonna a bhfuil dea-theist orthu—rud a chiallaíonn go raibh fanacht amháin ar a laghad acu agus nach bhfuil léirmheasanna diúltacha ar bith faighte acu—chomh maith le haíonna a chuaigh trí phróiseas deimhnithe aitheantais ilchéime Airbnb.

Leathnaíomar deimhniú aitheantais chuig gach aoi a dhéanann áirithint agus iad ag taisteal chuig an 35 tír agus réigiún is mó a bhfuil tóir orthu ar Airbnb agus a chuimsíonn 90% de na háirithintí go léir. Cuirfimid é seo ar fáil ar bhonn domhanda go luath in 2023. Má theastaíonn ID rialtais uait ó d'aíonna ar chúiseanna pearsanta, nó má tá sé riachtanach don cheantar ina bhfuil do réadmhaoin, is féidir leat é seo a iarraidh ar aíonna trí theachtaireacht a chur chucu trí do bhosca isteach óstála.

Fiú agus Áirithint ar an bPointe casta air, tá cásanna ann ina bhféadfá iarratais ar áirithint a fháil ó aíonna. D’fhéadfadh sé seo tarlú mura ndearna tú d’fhéilire a nuashonrú ar feadh tamaill, nó má bhí ort áirithint a chur ar ceal le déanaí. D'fhéadfadh aíonna nach gcomhlíonann do chritéir chun áirithint ar an bpointe a dhéanamh iarratais ar áirithint a sheoladh freisin. Maidir le haon iarratas a thagann tríd, beidh ort freagra a thabhairt trí ghlacadh leis an áirithint nó diúltú di, nó teachtaireachtaí a chur chuig d’aíonna ionchasacha laistigh de 24 uair an chloig.

In ainneoin na mbuntáistí a bhaineann le hÁirithint ar an bPointe, faigheann roinnt Óstach amach go n-oibríonn iarratais ar áirithint níos fearr dóibh:

• Ní thairgeann siad ach tréimhsí fanachta níos faide. Úsáideann Annie, Óstach in Sonoma, California, iarratais ar áirithint toisc nach gcuireann sí ach tréimhsí fanachta de bhreis agus 30 lá ar fáil chun rialacháin óstála ina limistéar a chomhlíonadh. “Ba bhreá liom Áirithint ar an bPointe a úsáid, ach tá i bhfad níos mó lóistíochta le hoibriú amach nuair atá tú ag óstáil duine ar feadh tréimhse chomh fada sin,” a deir sí.
• Bíonn riachtanais phearsanta uathúla acu. Tá íogaireacht chomhshaoil ag Nichola, Óstach in Guelph, Ceanada, a éilíonn uirthi a spás a choinneáil saor ó bholadh, agus, mar sin, úsáideann sí iarratais ar áirithint lena chinntiú go bhfuil aíonna sásta aontú lena rialacha tí sonracha. “Faighim mígréiní de thoradh táirgí cumhra agus, mar sin de, ní mór dom a chinntiú gur daoine iad m'aíonna a thuigeann ailléirgí bolaidh,” a deir sí.
• Tá gnéithe nó dúshláin speisialta ag a spás. I measc na samplaí a d’fhéadfadh a bheith ann tá seomra príobháideach a bheith i dteach ina bhfuil peataí nó páistí, nó spás thar a bheith tuathúil a d’fhéadfadh a bheith dúshlánach d’aíonna áirithe. Is féidir le hiarratais ar áirithint a bheith ina rogha mhaith lena chinntiú go bhfuil aíonna ar an eolas faoi na gnéithe uathúla uile de do theach sula dtiocfaidh siad ar cuairt.

Is fútsa atá sé má roghnaíonn tú Áirithint ar an bPointe a úsáid nó nach roghnaíonn, ach cuimhnigh gur cuid riachtanach de bheith i d'Óstach iontach í an iontaofacht. Cuimhnigh ar pholasaithe cealaithe Airbnb d'Óstaigh agus déan iarracht cealuithe a sheachaint nuair is féidir.

É sin ráite, má úsáideann tú Áirithint ar an bPointe agus mura bhfuil tú compordach le háirithint nuair a bheidh sé déanta (mar shampla, toisc go bhfuil d’aíonna ionchasacha ag fiafraí díot an féidir leo do rialacha tí a bhriseadh), is féidir leat áirithint a chur ar ceal gan phionós ag baint úsáid as an uirlis chealaithe ar líne, suas le trí huaire in aghaidh na bliana féilire.

Coinnigh i gcuimhne nach féidir leat áirithint a chur ar ceal choíche ar chúis ar bith a sháraíonn polasaí neamhleithcheala Airbnb. Agus má chuireann tú áirithint ar ceal, léiríonn sé sin go bhfuil an seans ann nach mbeadh Áirithint ar an bPointe oiriúnach duit i láthair na huaire. Mar sin, d'fhéadfadh Airbnb iarratais ar áirithint a sheoladh ina ionad sin le haghaidh do chéad chúpla áirithint eile.