Uirlisí comhóstála Airbnb a úsáid

Rud fíorthábhachtach chun go n-éireoidh leat mar Chomhóstach seanbhunaithe is ea cinneadh conas a roinnfidh tú féin agus Óstach an obair a bhaineann le liostú a bhainistiú.

An seolfaidh idir tú féin agus an tÓstach teachtaireachtaí chuig aíonna, nó an rachaidh duine agaibh ina chúram? An mbainisteoidh tú an liostú iomlán gan dul i dteagmháil leis an Óstach ach i gcás saincheisteanna, amhail iarratais ar aisíocaíocht? Cibé rud a shocróidh sibh, cuireann Airbnb uirlisí ar fáil chun an chomhóstáil a éascú.

Nuair a iarrfaidh Óstach ort a liostú a chomhóstáil, iarrfar air nó uirthi a roghnú cad iad na rudaí a mbeidh rochtain agat orthu. Seo roinnt roghanna:

• Rochtain iomlán
• Rochtain ar an bhféilire agus ar an mbosca isteach
• Rochtain ar an bhféilire amháin

Má tá rochtain iomlán agat, is féidir leat: 

• Liostú nua a chruthú
• Teachtaireachtaí a sheoladh chuig aíonna agus fógraí a fháil
• An féilire a nuashonrú
• Amharc ar stair na n-idirbheart
• Liostú a bhainistiú, mar shampla praghsáil agus sonraí eile
• Áirithintí a bhainistiú, mar shampla glacadh le hiarratais ar thurais agus iad a dhiúltú, cealuithe agus iarratais san Ionad Réitigh
• Iarratas ar aisíocaíocht a chur isteach
• Comhóstaigh eile a chur leis nó a bhaint, ceadanna a chur in eagar agus tú féin nó Comhóstach eile a ainmniú mar Phríomhóstach an liostaithe

Ach má tá rochtain iomlán féin agat, tabhair faoi deara nach mbeidh tú in ann:

• Eisíocaíochtaí Comhóstach eile a chur ar bun nó a chur in eagar

• Iarratais ar aisíocaíocht a bhainistiú nuair a bheidh siad curtha isteach  

• Modh eisíocaíochta agus eolas cáiníocóra úinéara liostaithe nó Comhóstaigh eile a fheiceáil nó a athrú

Is den chríonnacht é plean a chruthú le hÓstaigh ionas go mbeidh a fhios agaibh cé a bheidh i mbun aíonna a fhreagairt agus cumarsáide eile. Seans go mbeidh Óstaigh ag iarraidh ortsa dul i gceannas air sin uilig, nó seans gurbh fhearr leo an obair a roinnt.

Seo roinnt gnéithe de chumarsáid le cuimhneamh orthu:

• Teachtaireachtaí laethúla, ceisteanna a fhreagairt agus réiteach a fháil ar aon fhadhbanna a thagann chun cinn

• Iarratais ar áirithint a fhreagairt mura n-úsáideann liostú Áirithint ar an bPointe

• Iarratais ar aisíocaíocht a chur isteach (ach ní féidir ach le húinéir liostaithe iad seo a bhainistiú nuair a bheidh siad curtha isteach)

• Teagmháil a dhéanamh le Tacaíocht Phobail chun cabhair a fháil

• Comhóstaigh eile a bhainistiú

Dar le Sabrina, Comhóstach seanbhunaithe in Denver, Colorado, tá sé fóinteach duine amháin a chur i mbun cumarsáide le haíonna, “ionas go mbíonn sí seasmhach i gcónaí ó thaobh polasaithe de amhail lascainiú, aisíocaíochtaí agus fadhbanna le haíonna,” ar sise.

D'fhéadfadh fadhbanna teacht chun cinn mura bhfuil plean soiléir ann. “Nuair atá beirt ag roinnt an chineáil sin oibre, téann rudaí trí chéile,” arsa Dominic, Comhóstach seanbhunaithe i gCorn na Breataine. “Sin go díreach an t-am a fhágtar rudaí ar lár, níl na glantóirí faoi réir, rudaí mar sin.”

Is féidir le hÓstaigh uirlisí eisíocaíochta comhóstála roghnacha a úsáid chun céatadán nó suim sheasta in aghaidh na háirithinte a roinnt leat ar Airbnb. Is féidir leo ceann amháin de cheithre rogha eisíocaíochta a roghnú: 

• Roinn an táille ghlantacháin 

• Roinn an táille ghlantacháin móide céatadán de mhéid na háirithinte

• Roinn céatadán de gach eisíocaíocht

• Roinn suim sheasta de gach eisíocaíocht

Ní féidir ach le húinéirí liostaithe eisíocaíochtaí a chur ar bun. D'fhéadfadh teorainneacha a bheith ann ag brath ar shuíomh Óstaigh agus Comhóstaigh.

Nuair a chuireann Óstach eisíocaíocht chomhóstála ar bun, bíonn 14 lá agat le hí a dheimhniú nó a dhiúltú. Go hiondúil, pléifidh tú méid d'eisíocaíochta agus do mhodh eisíocaíochta le hÓstach agus glacfaidh tú leo sin sula seolfaidh an tÓstach an t-iarratas, ach má dhiúltaíonn tú bunú eisíocaíochta, beidh ar an Óstach moladh nua a sheoladh. 

Nuair a dheimhneoidh tú eisíocaíocht, tosóidh tú ag fáil eisíocaíochtaí as áirithintí thart ar 24 uair an chloig tar éis seiceáil isteach. Má dhéanann úinéir liostaithe nuashonrú ar eisíocaíocht reatha, ní bhainfidh sé ach le háirithintí a thosóidh tar éis duit an nuashonrú a dheimhniú.

Seans gur athraigh an t-eolas atá sa mhír seo ó foilsíodh í.