Bealaí simplí chun aoibhneas a chur ar aíonna le linn tréimhsí fanachta fada
Is minic a bhíonn riachtanais éagsúla ag aíonna a fhanann agat ar feadh 28 oíche nó níos faide ná mar a bhíonn ag cuairteoirí ar an deireadh seachtaine. Má fhreastalaíonn tú ar na riachtanais sin cruthaítear eispéiris taistil níos fearr do na haíonna—agus d'fhéadfadh sé go bhfaighfeá níos mó léirmheasanna cúig réalta mar gheall air sin.
Chun áthas a chur ar na haíonna a fhanfaidh ar feadh míosa, bain triail as na gothaí simplí seo thart ar sheachtain tar éis dóibh teacht.
Ceisteanna a chur ar na haíonna maidir leis an méid a theastaíonn uathu
Is tréimhse fhada í mí gan rud éigin a úsáideann tú go rialta sa bhaile agat, rud nárbh fhéidir leat a phacáil. Mar Óstach, is féidir leat a fhiafraí de d'aíonna an bhfuil bunriachtanais ar bith in easnamh orthu.
B'fhéidir go dtaitneodh piliúr nó blaincéad breise, scáth fearthainne nó fearas cistine leo, rud amhail tóstaer nó cumascóir. D'fhéadfadh do thoilteanas chun na háiseanna réasúnta beag seo a chur ar fáil difear mór a dhéanamh do leibhéal a gcompoird, agus beidh tú in ann an rud céanna a chur ar fáil d'aíonna amach anseo.
Deir Andrea, Sáróstach in Leavenworth, Washington, gur maith léi go leor a fhágail sa chistin le linn tréimhsí fanachta fada. “Cuirim neart duilleoga tae, caife, roghanna iomadúla déanta caife, agus ola agus spíosraí cócaireachta ar fáil do m'aíonna i gcónaí.”
Glanadh i lár an fhanachta a thairiscint
Cuireann go leor aíonna fáilte roimh ghlanadh saor in aisce leath bealaigh tríd an bhfanacht. Is buntáiste mór é dóibh, agus tugann sé deis duit cothabháil bheag a dhéanamh, amhail cadhnraí, bolgáin solais agus scagairí a athsholáthar.
Is maith le Annette, Sáróstach in San Francisco, a rá le haíonna: “Ós rud é go mbeidh tú anseo go ceann míosa ar a laghad, tá seans ann go mbeidh ár n-aird de dhíth ar rud éigin. Ná déan iarracht aon deisiúcháin a dhéanamh tú féin, is cuma cé chomh beag. Déan teagmháil linn láithreach, agus réiteoimidne é.”
Agus glantachán i lár na tréimhse fanachta á sceidealú, is smaoineamh maith é a chur in iúl d'aíonna go díreach cé a bheidh ag dul isteach sa spás, cén t-am a thosóidh siad, agus cá fhad is dócha a bheidh siad ann. Má shocraíonn tú ionchais shoiléire, léiríonn sé sin go bhfuil meas agat ar a bpríobháideacht agus ar a sábháilteacht.
D'fhéadfá seirbhís níos minice a chur ar fáil ar tháille freisin, rud a chuidíonn le tacaíocht a thabhairt don chriú glantacháin agus le d'áit a choinneáil glan.
Seirbhísí áitiúla a mholadh
Ní bhíonn eolas, atá chomh maith le do chuid eolais féin, ag aíonna ar do cheantar de ghnáth. Nuair a chuireann tú leideanna áitiúla chucu i dteachtaireacht nó i dtreoirleabhar is féidir leo lántairbhe a bhaint as a gcuairt.
Cuir liosta gairid le chéile, agus smaoinigh ar sheirbhísí a d'fhéadfadh a bheith ag teastáil ó aíonna atá ar thréimhsí fanachta níos faide, mar shampla siúl le madraí, seachadadh earraí grósaera, nó deisiúchán ríomhaire glúine. Má mholann tú ceannaithe áitiúla is féidir leat nasc a dhéanamh le d'aíonna agus tú ag tacú le do phobal ag an am céanna.
Tarraing aird na n-aíonna ar na háiteanna is fearr leat, go háirithe na háiteanna is lú an aithne atá orthu nár chóir dóibh a chailleadh. Ná déan dearmad féilte nó imeachtaí poiblí móra eile a bheidh ar siúl le linn a bhfanachta a lua.
Nithe beaga speisialta a chur ar fáil
Is iondúil go mothaíonn aíonna gur smaoiníodh fúthu nuair a dhéantar nithe beaga speisialta. D'fhéadfá cárta a bhfuil cúpla focal buíochais (“Go raibh maith agat as fanacht againn”) agus féirín tuisceanach a chur in aice leis an doras :
- Buidéal fíona réigiúnaigh
- Buillín aráin úrbhácáilte
- Cuimhneachán ón gceantar
“Dá lú agus dá éadroime é, is ea is fearr é,” arsa Donna, Sáróstach in San Francisco. “Mo rogha phearsanta féin ná rud éigin is féidir a ithe, ionas gur féidir leo é a úsáid ar an bpointe boise más mian leo.” Is féidir le hearraí a dhéantar go háitiúil gliondar a chur ar aíonna agus d'áit a mheabhrú dóibh tar éis dóibh seiceáil amach.