Scaoil le cumhacht do phróifíle óstaigh

D'inis aíonna dúinn gur mian leo fios a bheith acu cé leo a mbeidh siad ag comhroinnt an tí sula gcuirfidh siad seomra in áirithe. Cabhróidh do phróifíl óstaigh leat tú féin a chur in iúl agus an méid atá rompu tabhairt le fios d'aíonna.

Is é do phróifíl óstaigh radharc an aoi ar do phróifíl Airbnb. Tá d'ainm, líon na mblianta a bhfuil tú ag óstáil, do rátáil réalta agus líon na léirmheasanna ó aíonna le feiceáil ag an mbarr. Ina dhiaidh sin tá aon sonraí pearsanta is mian leat a chur leis, amhail do phost, do chaithimh aimsire, na teangacha atá agat, fíricí fánacha, ainm do pheata agus an rud atá speisialta faoi fhanacht i d'áit.

D'fhéadfadh sé go bhfeicfeadh aíonna codanna de do phróifíl óstaigh i dtorthaí cuardaigh ar sheomraí. Is féidir leo tapáil ar do ghrianghraf chun do phróifíl iomlán a fheiceáil. Tá fáil ag aíonna ar do phróifíl ó do liostú freisin.

Bain triail as na leideanna seo chun grianghraf a ghlacadh a rachaidh i bhfeidhm go mór ar dhaoine.

Cuidíonn do phróifíl óstaigh leat caidreamh a chothú le haíonna. Má fhaightear amach go bhfuil caitheamh aimsire, cineál oibre nó ciall don cheol i gcoiteann agaibh, mothaítear muintearas.

“Ní chaithfidh an t-óstach a bheith an-mhór liom, ach ba mhaith liom a bheith ar mo shuaimhneas agus mé ag comhroinnt spáis leis nó léi," arsa Stacey, aoi atá lonnaithe in Oklahoma City. “Cuireann an phróifíl i gcuimhne duit gur duine atá i gceist agus tugann sí tuiscint duit ar an gcaoi a mbeidh cúrsaí le linn na cuairte."

Nuair a chuirtear níos mó sonraí ar fáil roimh ré, cabhraíonn sé le haíonna a chinneadh an bhfuil d'áit oiriúnach dá riachtanais taistil, agus sábhálann sé am agus fuinneamh ortsa ag an am céanna. “Laghdaíonn sé líon na dteachtaireachtaí anonn agus anall agus éascaíonn sé déanamh na háirithinte, toisc go bhfuil freagra ar mo cheisteanna cheana féin,” arsa Stacey.

Úsáideann Chris, Sáróstach in Macon, Georgia, a phróifíl óstaigh chun leac an doichill a bhriseadh le haíonna. “Is duine ciúin mé, agus chabhraigh sé liom a bheith níos oscailte,” ar seisean.

Ina phróifíl, deir Chris gur lúthchleasaí é atá ar scor agus gur imir sé peil Mheiriceánach do 2 ollscoil a bhfuil dlúthbhaint acu leis an bpobal Gorm go stairiúil. Luann sé an méid seo a leanas faoi féin freisin:

• Caitheann sé an iomarca ama ag imirt gailf
• Rugadh sna 80idí é
• Cuireann sé beár caife ar fáil d'aíonna

Má ghlacann tú an t-am le beagán níos mó eolais a thabhairt d'aíonna sula gcuirfidh siad do sheomra in áirithe, is dóichí go bhfaighidh tú aíonna a bhfuil caithimh aimsire agus nósanna acu atá cosúil leis na cinn atá agatsa.

Mar a deir Stacey aoi, “Má léim go gcaitheann an t-óstach ‘an iomarca ama’ ag canadh cáirióice, tá a fhios agam go mbeidh sé nó sí ag súil le haoi de chineál difriúil le hóstach a chaitheann ‘an iomarca ama’ sa bhaile ag craosfhéachaint ar Netflix."

Seans gur athraigh an t-eolas atá sa mhír seo ó foilsíodh í.